Төркиядә белем алучы Татарстан студентларын туган илгә кайтару турында күрсәтмәләр булмады – ТР Мәгариф һәм фән министрлыгы

Хәзерге вакытта Төркиядә Татарстаннан 8 студент белем ала. Россия һәм Төркия арасындагы катлаулы геосәяси вазгыятькә карамастан, ТР Мәгариф һәм фән министрлыгына студентларны кайтару турында күрсәтмәләр килеп ирешмәде. Бу хакта “Татар-информ” МА корреспондентына әлеге министрлыкның матбугат сәркатибе Алсу Мөхәммәтова хәбәр итеп: “2012 елдан бирле ТР Мәгариф һәм фән министрлыгы студентларны Төркиягә белем алырга җибәрмү белән шөгыльләнми”, – дип тәгаенләде.

Алсу Мөхәммәтова әйтүенчә, эш шунда: Төркиядәге Төрки халыклар эшләре идарәсе тарафыннан “Төркия стипендияләре” программасына үзгәрешләр кертелгән. Әлеге үзгәрешләр нигезендә абитуриенларга Төркия вузларына турыдан-туры мөрәҗәгать итү мөмкинлеге булдырылган. Шуңа бәйле рәвештә, кабул итү шартлары да үзгәреш кичергән. Ягъни хәзер студентлар бу чит ил югары уку йортларына ТР Мәгариф һәм фән министрлыгы аша түгел, ә мөстәкыйль мөрәҗәгать итә.

ТР Мәгариф һәм министрлыгы мәгълүматларына караганда, хәзерге вакытта Төркиядә Татарстаннан 8 студент белем ала. Алар Әнкара, Иске Шәһәр, Кайсери, Конья шәһәрләрендә укый. Студентларның барысы да укуларын киләсе елга тәмамлый, ягъни алар өчен 2015-2016 уку елы – соңгысы.

“Алар Төркия югары уку йортларына мөстәкыйль рәвештә керде. Хәзерге вакытка аларны кайтару турында бернинди күрсәтмәләр юк”, – дип сүзен йомгаклады әңгәмәдәш.

Искәртеп үтик: РФ Мәгариф һәм фән министрылыгы Төркиядә академик алмаш буенча белем алучы Россия студентлар туган илгә кайтарылычак, дип белдерде. Бүген аларның саны – 100 кеше.

Моннан тыш, ведомство Россия вузларыннан Төркия университетлары һәм институтлары белән хезмәттәшлекне өзүне таләп итте.

Шуны да билгеләп узыйк: быел Татарстандагы вузларда бакалавриат, специалитет, магистратура программалары буенча Төркия Республикасының 69 гражданы белем ала: КФУда – 54, Казан дәүләт архитектура һәм төзелеш университетында – 4, Казан илкүләм тикшеренү технологик университетында һәм Казан дәүләт аграр университетында – 1әр, Казан илкүләм тикшеренү техник университетында – 2, Казан дәүләт медицина университетында – 7.
“Татар-информ”