"Әбү Хәнифә" балалары татар конгрессына килде

Бөтендөнья татар конгрессының Башкарма комитеты рәисе урынбасары Ренат Вәлиуллин "Әбү-Хәнифә" исемендәге мәдәни-агарту лагерендә ял итүче балалар төркеме белән очрашты. Ул балаларга Бөтендөнья татар конгрессы турында кыскача сөйләде, Казанда ни күргәннәрен, ни ошатканнарын сорашты, Татарстанда булган форсаттан файдаланып татарча күбрәк аралашырга, сөйләшергә чакырды. Балалар үз чиратында үзләрен кызыксындырган сораулар бирде, дип хәбәр итә татар конгрессы.

Очрашу истәлеге итеп нәни кунакларга китаплар бүләк ителде. Шуларның икесенә Ренат Вәлиуллин аерым игътибар итәргә чакырды. Аның берсе – сөекле шагыйребез Габдулла Тукайның балалар өчен язылган шигырьләре җыентыгы. Ул Татарстан Президенты Рөстәм Миңнехановның балаларга мөрәҗәгате белән ачыла. Бу китап өч телдә, өстәмә бүләге дә бар – татарча мультфильмлы СД. Әлеге басманы “Татармультфильм” берләшмәсе әзерләгән, ул күптән түгел бакыйлыкка киткән Туфан Миңнуллин фатыйхасы белән булдырылган. Икенче китап балалар өчен махсус әзерләнгән Ислам нигезләрен аңлатучы басма. Ренат Вәлиуллин сүзләренчә, ул да балалар өчен кызыклы һәм файдалы булачак, дип яза татар конгрессы.

Илле баладан торган бу төркем әлеге лагердә булган балаларның бер өлеше генә. Инде бишенче җәй эшләп килгән бу ял итъ урынында быел өч йөзләп бала татар теле һәм мәдәнияте, Ислам белеме белән танышкан. Нигездә алар Мәскәү һәм Түбән Новгородтан килгән. Баштарак балалар Түбән Новгород өлкәсендәге авылларда анда яшәүче татарлар тормышы белән танышкан. Ял ахырында бер төркем балалар Казанга килгән. Биредә алар Татарстан башкаласы белән танышалар. Лагерьне оештыручылар: Россиянең Европа өлеше һәм Түбән Новгород Диния Нәзарәтләре, МРОМ “Рисалят”, “Ихлас” хәйрия фонды, МИРО “Солидарность”. Бу телгә алынган ике соңгы оешманың рәисләре Әнәс хәзрәт Мамедов һәм Комектес хәзрәт Жагипаров лагерьнең дә, Казанга сәяхәтнең дә җитәкчеләре дә булып торалар.

Тимер Сәгыйтов