Наркотик һәм исерткеч эчемлекләрдән бәйле булганнарны тернәкләндерү буенча мөселман үзәге Алексеевск районында булачак

Татарстан мөселманнары Диния нәзарәте рәисе мөфтие Камил хәзрәт Сәмигуллин үзенең урынбасары, иҗтимагый проектлар җитәкчесе Илдар хәзрәт Баязитов белән нәзарәтнең социаль эшләре турында фикер алышты.

Илдар хәзрәт мөфтине наркотиклар һәм исерткеч эчемлекләрдән бәйле булганнарны тернәкләндерү буенча мөселман үзәген ачуга әзерлек белән таныштырды. Әлеге үзәк Алексеевск районында булачак. Бу уңайдан хәзерге вакытта район хакимияте тәкъдим иткән бинага кагылышлы смета төзелә.
Шулай ук Илдар хәзрәт Лаеш районы хакимиятенең Зур Кабан авылында мәчет төзергә җир бирүен хәбәр итте. Әлеге төзелеш чыгымнарын күтәрергә теләк белдергән инвестор да бар.

ТР мөселманнары Диния нәзарәте Татарстан инвалидлар җәмгыяте белән хезмәттәшлек турында килешү төзеде. Хәзер атнаның һәр сишәмбе һәм пәнҗешәмбе көнендә "Ярдәм” мәчете янындагы спорт мәйданчыгында авыр хәрәкәтләнүче инвалидлар футбол уйный ала. Әлеге уеннардан соң аларга мәчеттә мәҗлесләр үткәреләчәк. Якын арада мөслимәләр өчен "Бизнес леди” дип аталган хатын-кызлар клубын ачу күздә тотыла. Илдар хәзрәтнең әйтүенә караганда, әлеге клуб актив мөслимәләрне иҗтимагый эшләргә җәлеп итү максатыннан оештырыла, дип хәбәр итә мөфтиятнең матбугат хезмәте.
Чыганак: "Татар-информ"