Мөслимәләр Болгарда Барс статуясы куюны туктатуны таләп итә

Русиянең төрле төбәкләрендәге мөслимә оешмалары җитәкчеләре Татарстан президенты Рөстәм Миңнеханов, Дәүләт Советы рәисе Фәрит Мөхәммәтшин, Дәүләт киңәшчесе Минтимер Шәймиевтән Болгарга Барс сынын – мәҗүси билгене куймауны сорап хат язды.

“Саклаучы” Барсны Болгарга куймауны сорап язылган мөрәҗәгатькә Татарстан “Мөслимәләр” җәмгыяте рәисе Әлмирә Әдиятуллина, Мәскәүдә чыгарылган “Мусульманка” журналының баш редакторы Г.Джемаль, Саратовның “Родник” хатын-кызлар оешмасы җитәкчесе Хәдичә Бибарсова, Уфаның “Ихлас” мәчете каршындагы әхлак мәктәбе директоры Ф.Фәтхуллина кул куйган.

Хатын-кызлар лидерлары белдергәнчә, Русиядә ислам бишеге булган Болгар шәһәре ислам диненең кыйммәтләре халкыбыз арасында тирән тамырлы булуын күрсәтә. Болгар шәһәре бары ислам дине белән бәйле, шуңа шәһәрдә яки аның янында мәҗүси сыннан кую – Болгар идеясен бетерүгә, бабаларыбыз сайлаган юлны бозуга китерә.

Русия мөслимәләре лидерлары Болгарда сын кую фикере халык белән сөйләшмичә куела алмый дип саный. Шуңа алар Болгарда статуя кую эшен туктатуны таләп итә.

“Татар-ислам” сайтына билгеле булганча, Минтимер Шәймиев Болгарда Барс сынын кую карарын кабул итте һәм статуя Болгар җыеныннан соң елга портында урнаштырыла. Ләкин Болгарда Барс куюга күпчелек халык каршылык белдерә.

Александр Долгов