КДМУда “Ак халатлы фәрештәләр” медицина фестивале уза

6-16 февраль көннәрендә Казан дәүләт медицина университеты “Ак халатлы фәрештәләр – Ангелы в белых халатах” киңкүләм медицина фестивален уздыра. Аның кысаларында факультетларның презентациясе, дәвалау учреждениеләре, КДМУ музейлары буйлап экскурсияләр, тренинглар, конкурслар, психологик тестлаштырулар үткәреләчәк. Бу хакта ТР Сәламәтлек саклау министрлыгының матбугат хезмәтендә хәбәр ителә.

6 нчы февральдә абитуриентлар өчен Татарстанның барлык үзәк район хастаханәләре, Казанның әйдәп баручы дәвалау, профилактик һәм социаль учреждениеләре ишекләре ачык булды. Укучылар белән очрашулардан соң, баш табиблар КДМУны тәмамлаган чыгарылыш белгечләре белән эшкә урнашу мөмкинлекләре турында фикер алышкан. КДМУ ректоры Алексей Созинов Яр Чаллы, Менделеевск шәһәрләрендә укучылар алдында чыгыш ясаган.

Булачак абитуриентлар 7 нче февральдә Казан медицина университеты белән танышкан.

Моннан тыш, 8-16 февраль көннәрендә КДМУның төп уку корпусында көн саен 16 сәгатьтә иң тәҗрибәле мөгаллимнәр медицина һәм социаль темага популяр лекцияләр укыячак. Лекциягә килә алмаучылар өчен КДМУ сайтында (http://www.kgmu.kcn.ru/abiturients/angels) он-лайн трансляция каралган.

Фестиваль кысаларында чыгарылыш студентлары белән эш алып бару ниятләнә. 8-12 февраль көннәрендә 5 көн дәвамында 15 сәгатьтә КДМУ территориясендә ТР Сәламәтлек саклау министрлыгының кадрлар бүлеге башлыгы Ю.А. Кнни һәм ординатура белән аспирантураның белем бирү программалары буенча проректоры А. Малова тарафыннан КДМУны тәмамлаган яшьләргә консультацияләр уздырылачак.
“Татар-информ”