Казан тормыш сыйфаты буенча илнең иң яхшы шәһәрләре өчлегенә керде

Казан тормыш сыйфаты буенча Россиянең иң яхшы шәһәрләре рейтингында лидерлар өчлегенә керде. РФ Хөкүмәте карамагындагы Финанс университетының Социология департаменты Россия шәһәрләрендә яшәүче кешеләрнең тормыш сыйфатын бәяләүгә багышланган чираттагы тикшеренүләр нәтиҗәсен бастырды.

Тикшеренү Россиянең 38 зур һәм урта шәһәрендә үткәрелгән. 2014 елда узган алдагы тикшеренүдәге кебек үк, шәһәрләрдә тормыш сыйфатын бәяләү өчен өч төрле алым файданылган.

Матди иминлек дәрәҗәсе буенча тикшеренү үткәрелгән шәһәрләр арасында зур аерма белән Мәскәү лидерлык итә. Аннан соң Владивосток, Красноярск, Екатеринбург һәм Хабаровск килә. Медицина хезмәте күрсәтү буенча беренче урыннарны Мәскәү, Санкт-Петербург, Чаллы, Төмән һәм Ижевск били.

Белем бирүнең сыйфаты буенча Санкт-Петербург, Томск, Төмән, Чиләбе, шулай ук Хабаровск әйдәп бара. Әлеге күрсәткеч буенча Әстерхан, Липецк, Чаллы, Тольятти артта калучылар рәтендә.

Шул ук вакытта Россиядә торак фондның сыйфаты һәм ТКХ эше буенча Чаллы, Грозный, Төмән, Мәскәү һәм Краснодар шәһәрләре беренче. Россиянең иң төзек шәһәрләре (тикшеренү үткәрелгән шәһәрләр арасында - ) - ул Грозный Казан, Төмән, янә Чаллы һәм Кемерово.

Илдә юл хуҗалыгы сыйфаты Төмән, Чаллы, Новокузнецк, Грозный һәм Казан беренчелекне били.

Иң югары сыйфатлы тормышлы шәһәрләр булып Севастополь, Краснодар, Казан, Төмән һәм Грозный санала, дип ассызыклый социологлар.
«Татар-информ»