Чарада моңа кадәр иҗтимагый тормышка кушылмаган яңа кешеләрнең күп булуы хакында хәбәр ителә

Ригада Латвиянең Милли мәдәниятләр берлеге ассоциациясендә төбәкнең татар һәм башкортлары чәй бәйрәме уздырган.

Чарада моңа кадәр милли иҗтимагый тормышка кушылмаган яңа кешеләрнең күп булы сизелү хакында “Татар-информ”га бәйрәмнең координаторы Рамил Кадыйров хәбәр итте. Аның сүзләренчә, бәйрәм чарасында чәйгә кагылышлы конкурслар оештырылган, катнашучылар чәй әзерләү рецептлары белән бүлешкән. Татар һәм башкортлар тормышы турында сөйләгән фотографияләр күрсәтелгән, катнашучылар аларда нәрсә сурәтләнүен әйтеп бирергә тиеш булган.

Моннан тыш, татар профессиональ музыкасына нигез салучыларның берсе булган Салих Сәйдәшевның (1900-1954) туган көнен билгеләп үткәннәр. Кичәдә җыр һәм биюләр башкарылган, милли мохит тудырылган.

Латвиянең “Чишмә” татар-башкорт мәдәни берләшмәсе (җитәкчесе - Зөфәр Зәйнуллин) тарафыннан оештырылган кичә күмәкләп чәй эчү белән тәмамланган.
“Татар-информ”